003 [單車雜談] Shimano 2023年全新套件 CUES系列
Shimano 於2023年3月發布了一個新系列的變速系統 - CUES. (讀Qs) 套套件已經見街，我見鎮洋都有開始賣緊了。
係網上爬文好耐，大部份報導都係跟住Shimano官方文稿背書, 都唔係好明究竟呢套所謂既新系統CUES夠竟係乜。因為都唔係好覺有人講解，我就試下去爬下呢套野究竟係賣乜。
Shimano係佢官網度對CUES有咁既描述﹕
" 對所有追求活潑生活的騎乘者來說，SHIMANO CUES 正是最佳選擇。我們創立此品牌，為各種款式的自行車提供多功能性。其具有無與倫比的順暢性且輕鬆舒適的變速功能，可滿足電動自行車需求的堅固性，耐用設計讓使用壽命延長高達三倍。踏上 SHIMANO CUES 乘風前行，迎接騎乘的樂趣。"
大家睇完官網既解釋係咪都理解CUES係乜野黎呢? 哈哈，你明呀? 我就睇唔明喇。
好，我地再刨深少少睇下套野賣咩藥
=============================================================================
重點一﹕堅固耐用
CUES的官網裡面不斷強調CUES使用Linkglide system, 突竟Linkglide係乜呢?
" SHIMANO LINKGLIDE 為順暢可靠的變速設立新標準。其堅固的原創設計提供更優良的耐用性與順暢的變速，實現持久性能。" LINKGLIDE既解書標榜左2個重點﹕
堅固耐用
順暢
堅固就係加厚左既飛輪片同改善左既齒型. 據佢地既測試，相較以前用HYPERGLIDE(HG)飛輪 會襟用三倍. 佢地做個測試, HG飛輪轉檔1200次就會崩......
咁通過加厚飛輪片就增加堅固度啦, 咁所謂順暢度又從何說起呢?
哦，原來係用新既設計，令轉波時既震蘯減低一D. 即係"嘭"果下無咁震. 咁Power Lost就會細左.順滑左。
重點二﹕通用性
據Shimano自己講，CUES既意思係"Creating Unique ExperienceS"，初心係為左統一坊間入門級套件既制式(即係D Cheap野)，方便車鋪做維修時唔洗週圍搵件。因為經歷咁多年咁多代既發展，Shimano既系統出現非常嚴重既碎片化問題。有Tourney(6/7速), Altus(7/8速), Acera(7/8速), Alivio(9速),Deore(10/11/12速), XT(11/12速)等，中間因為過往市場策略既問題(我估咋)，唔同速系統互相唔兼容。撇除最尖端既12速產品同最低階既6/7速舊式旋飛市場，今次CUES就係將11速至7速既卡飛制式統一。
咁點解要統一呢? 統一黎做乜呢? 今次廠方推出既通用套件，反映7/8/9/10/11速呢堆配速套件已經變成雞肋，廠方都唔想再攪咁多條生產線，老哥佢而家只係想攪Di2坑錢，舊式機械系統索性精簡左佢，慳返幾條生產線，佢做生產既開心，車鋪做維修既又開心，唔洗再週圍搵料又要睇下兼唔兼容，(而家要搵8速野都唔易)，以後乜野車要整就叫佢死條心，換CUES晒佢就係。正如一個城市有好多垃圾, 政府唔分類喇, 掘個大窿倒晒入去算數，無眼屎乾淨盲，相信下一步Shimano就會官宣停產Altus, Acera, Alivio系列。因為買菜搭蔥係定律黎，所以今次呢組粗野仲可以用落電輔系統度，係咪好好呢。總之唔係XTR就換佢啦。
暫時CUES既套件只對應民用同山地系統(只有平把及只對應山地Chain line, O.L.D. 135規格車架)，一脈相承，我相信唔洗好耐就會有另一套件去接收埋公路系統11速以下既機械式變速。
留言
發佈留言