002 秋遊
中秋節屯門至沙田(原定)單車遊
阿Kip相約好友趁中秋假期來一轉單車旅行。計劃由屯門出發沿超級單車徑去沙田，全程約55公里，預計六個鐘頭完成。好友今次選擇用SR8出遊，我踩SR7係後面跟拍。
出車時間比預定遲左，已經接近九點，但係早餐唔可以唔食，所以都係洪水橋食個早餐先再起程。洪水橋有間茶餐廳有露天茶座，車可以泊係旁邊，對單車友十分方便。
沙爹牛肉公仔麵+腸仔蛋牛油餐包+凍奶茶，完美。(不過食得多好易肥)
由洪水橋出發，一行人沿單車徑往北行，雖然屯門至元朗單車徑有越野單車徑嘅“美譽“，不過作為俾朋友仔阿Mo熟習斜躺車就十分適合。要穿過無理地狹窄嘅神主牌圍欄，要熟習慢速控車，小上坡也需要預先調整波段。
由於最近元朗西鐵站有新樓盤興建中，青山公路Yoho town至博愛醫院一段單車徑封閉。想做守法市民的話，只能過對面馬路經熙來攘往嘅雞地再返上單車徑。
最近我乖咗幾次之後實在覺得好厭煩， 所以今次我決定行一條我估計行得到嘅新路。 就係喺元朗工業邨入面，唔跟單車徑去鈞樂新村，而係行馬路過采葉庭山貝村， 經元朗舊墟路進入東頭村，再係元朗西鐵站尾返回馬路十分少車的路段。前行過廻旋處就係黃屋村。沿河邊小路到達蠔洲路。 如果有行過呢條路嘅朋友就知道我想去邊。
河邊小路係一條凹凸不平嘅砂石路， 路中間有好多大大細細嘅碎石深埋喺泥土裏面。 踩單車通過絕對會震到飛起。躺車過唔過到呢？其實我已經試過用SR7同SR8都可以輕鬆通過。不過躺車新手阿Mo一撞到石頭，架車霎時變成零速度，想踩踏加速，奈何牙盤重腳，情急補唔到腳唯有翻車落地，好彩人無受傷，扶正架車後就可以繼續前行。其實只要一早轉用最低波就可以輕鬆渡過喇。
通過河邊嘅蠔洲路，就會到達南生圍路！無錯，我避開左單車徑行左入黃屋村，就可以避過埋博愛醫院大斜路直入南生圍。今日我目的地唔係南生圍，所以係南生圍路橋口我地就會出返大路。
呢個時候我地見到有外籍人士一家三口左望右望似係搵緊路。停低問佢地想去邊，原來佢地想去粉嶺。同路丫，於是就引返佢地出青山公路潭尾段單車徑，指引佢地沿紅色單車徑經壆圍北上就可以到上水。
基於種種理由，我地一行四人去到錦田河既彼岸，壆圍南路既時侯，已經係正午12點。比預計時間已遲左一個小時。[壆圍南路，同南生圍路分別係錦田河既兩岸，都係一邊望錦田河景觀，另一面係樹林風光。錦田河河面開揚寬闊，河岸邊各有淺灘，有大片紅樹林，近南生圍路一側較多較密也較高大，反之壆圍南路一側則較少較低矮，因此由壆圍南路望河景相比南生圍路更加開掦，論河景係呢邊較優。
雖然話係中秋，但天氣一啲秋意都無，溫度高達31度，萬里無雲不特止，仲要風力微弱霧霾嚴重，空氣翳焗得呼吸都有d困難。我已經無理口罩唔口罩嘅問題，每啖索入嘅空氣都係熱騰騰。
究竟係汗水黏結係皮膚上唔肯離開，定係汗水不停蒸發再不停排出，我已經分唔清楚。體感溫度就好似焗緊桑拿一樣----熱空氣包圍住整個人，皮膚上面全部都係汗水，旁邊坐住幾個無著衫既男人，大家困住係一個廿十尺唔夠既空間，你眼望我眼，含住一口悶氣，無人開到口講說話，但係又無人肯行出房，感覺就係咁討厭。
 |
| 錦鏽花園大道前小河 |
離開錦鏽花園繼續北行前往加州花園途中，Josh的老貂爆胎了。今次出行四部車﹕SR7、SR8，風行1403同埋Dahon Classic V (老貂)，總共有4種尺寸內胎，分別係14"x 1.75(美咀), 18"x1.5(美咀), 16"x1.35(法咀), 16"x1.5(美咀). 我一向都會帶齊出車所需要既內胎，點之摷均所有車袋，就係唯獨無帶16"x1.5(美咀)........... 好彩, 俾我係工具盒入面搵到最後一塊補胎貼，花左接近30分鐘完成換胎程序。
重新出發，阿MO對SR8已經上手。
天氣悶熱，加上洗左心力去換胎 (<-籍口?) 個人好似洩左度氣
結果踩到上水我就頂唔順，要提早收隊，唯有下次再約過啦…
題外話 : 去到米埔一段我準備停車係燈口燈紅綠燈，點知停車果下速度係0既情況之下上唔到壆，實現在零公里翻車。全世界望住都有陣𤓓味.....
留言
發佈留言