單車轆客

中秋節屯門至沙田(原定)單車遊 阿Kip相約好友趁中秋假期來一轉單車旅行。計劃由屯門出發沿超級單車徑去沙田，全程約55公里，預計六個鐘頭完成。好友今次選擇用SR8出遊，我踩SR7係後面跟拍。 前面黃色車係SR8, 後面黑色車係SR7。遲下將會講下佢地嘅身世。 出車時間比預定遲左，已經接近九點，但係早餐唔可以唔食，所以都係洪水橋食個早餐先再起程。洪水橋有間茶餐廳有露天茶座，車可以泊係旁邊，對單車友十分方便。 沙爹牛肉公仔麵+腸仔蛋牛油餐包+凍奶茶，完美。(不過食得多好易肥)  由洪水橋出發，一行人沿單車徑往北行，雖然屯門至元朗單車徑有越野單車徑嘅“美譽“，不過作為俾朋友仔阿Mo熟習斜躺車就十分適合。要穿過無理地狹窄嘅神主牌圍欄，要熟習慢速控車，小上坡也需要預先調整波段。 由於最近元朗西鐵站有新樓盤興建中，青山公路Yoho town至博愛醫院一段單車徑封閉。想做守法市民的話，只能過對面馬路經熙來攘往嘅雞地再返上單車徑。 最近我乖咗幾次之後實在覺得好厭煩， 所以今次我決定行一條我估計行得到嘅新路。 就係喺元朗工業邨入面，唔跟單車徑去鈞樂新村，而係行馬路過采葉庭山貝村， 經元朗舊墟路進入東頭村，再係元朗西鐵站尾返回馬路十分少車的路段。前行過廻旋處就係黃屋村。沿河邊小路到達蠔洲路。 如果有行過呢條路嘅朋友就知道我想去邊。 河邊小路係一條凹凸不平嘅砂石路， 路中間有好多大大細細嘅碎石深埋喺泥土裏面。 踩單車通過絕對會震到飛起。躺車過唔過到呢？其實我已經試過用SR7同SR8都可以輕鬆通過。不過躺車新手阿Mo一撞到石頭，架車霎時變成零速度，想踩踏加速，奈何牙盤重腳，情急補唔到腳唯有翻車落地，好彩人無受傷，扶正架車後就可以繼續前行。其實只要一早轉用最低波就可以輕鬆渡過喇。 通過河邊嘅蠔洲路，就會到達南生圍路！無錯，我避開左單車徑行左入黃屋村，就可以避過埋博愛醫院大斜路直入南生圍。今日我目的地唔係南生圍，所以係南生圍路橋口我地就會出返大路。 呢個時候我地見到有外籍人士一家三口左望右望似係搵緊路。停低問佢地想去邊，原來佢地想去粉嶺。同路丫，於是就引返佢地出青山公路潭尾段單車徑，指引佢地沿紅色單車徑經壆圍北上就可以到上水。 基於種種理由，我地一行四人去到錦田河既彼岸，壆圍南路既時侯，已經係正午12點。比預計時間...

2022年都已經9月, 好似都無乜踩過車。單車係高純度既毒品，一上左癮，無得踩車真係好吊癮。 之前一路都係踩SR7，今次係用久違嘅SR8。SR8自從阿女踩過之後就被佢謀左，而家佢要住Hall, 我梗係拎返黎踩下。太即興，太無準備，著住涼鞋就去左南生圍打左個白鴿轉。雖然都成五點先起步，但都少少熱。條路線已經踩熟踩到爛，但係踩躺車嘅感覺就係唔一樣，你享受嘅唔係條路線，而係享受駕御架車，架車對波段係好敏感，行唔同路況真係要配合好波段先會順。   假期好怕去南生圍，人多，私家車又多。踩幾步就要避車，往時我只會係夜晚先去。但係果日心血來潮都唔理得咁多。點知又好喎，唔算多人又唔算多車。 南生圍路 南生圍路盡頭迴旋處 南生圍路入口環迴公路橋底 晚燈模式 洪水橋重要補給站 - 陳文記士多 係單車徑路邊，方便過7-11

重啟部落 2020年末，脫離左重度使用既Facebook之後，香港有部份電子難民移民左去Mewe，我就係其中一個。只係2年落黎，Mewe始終成唔到氣侯，自己用其實無乜所謂，但係想俾多d人討論斜躺車就十分不足。另外係全世界關於斜躺車既討論唔多，係香港既討論更加係稀少，攪到都無乜資料可以Share。有見及此，既然無人寫，就唯有我自己寫啦。 所以我就諗住開呢一個頻道， 睇下可唔可以識到鍾意單車，尤係係鍾意斜躺嘅朋友。 我係阿Kip。呢度主要係為斜躺車而來，斜躺車在香港，以及其他香港單車瑣碎事。如果你係茫茫網海都search到黎呢個部落，我諗你應該係search左躺車兩個字嘅有緣人。 係度留低香港靠背式(斜躺)單車會 Recumbent Cycling Club of Hong Kong既Facebook及MeWe連結，有興趣就加入啦。 Facebook :  香港靠背式(斜躺)單車會 Facebook 專頁 MeWe :  香港靠背式(斜躺)單車會 MeWe社群